Messi avunja rekodi ya magoli Barcelona

Mshambuliaji wa kimataifa wa Argentina anayechezea klabu ya Barcelona ya nchini Hispania amevunja rekodi ya upachikaji wa magoli iliyokuwa inashikiliwa na Paulino Alcantara. Paulino Alcantara ambaye ni mzaliwa Philippines  aliichezea Barcelona  toka mwaka 1912 mpaka 1927 alifanikiwa kufunga magoli 369 katika michezo 357 ukijumuisha ya kirafiki.

Ikumbukwe pia miaka miwili iliyopita Messi aliivunja rekodi ambayo ilikuwa inashikiliwa na Cesar Rodriguez ya upachikaji wa magoli katika mechi za mashindano, yaani magoli ambayo hayausiani na mechi za kirafiki. 

Messi mwenye umri wa miaka 26 amevunja rekodi ya Paulino jana katika mechi ya la liga iliyowakutanisha na Osasuna, katika mchezo huo ambao Barcelona waliibuka na ushindi wa mabao 7 kwa bila Messi aliifunga magoli matatu na kufikisha idadi ya magoli 371 ukijumlisha na yale ya michezo ya kirafiki.

Baada ya kuivunja rekodi hiyo Mess kwa sasa anafukuzia kuivunja rekodi nyingine ya upachikaji wa mabao kwenye ligi ya mabingwa Ulaya, ambapo Raul Gonzalez wa Real Madrid ndiye anayeshikilia rekodi hiyo kwa kupachika mabao 71 wakati Messi mpaka sasa ana magoli 67.